Skriða - Hörgárbyggð
Þór Jónsteinsson og Sigríður Kr. Sverrisdóttir

25.10.2010

Kíkið á önnur dýr


24.10.2010

Jæja þá er loksins komið líf á heimasíðuna aftur eftir tveggja mánaða hlé, sem skapaðist sökum anna, bilunar í tölvu og leti í húsmóðurinni.  En betra er seint en aldrei!!  Nú er fjárragi að mestu lokið, búin að fara oft í göngur og sækja margar kindur og hrista af okkur spikið í leiðinni (þó verður maður nú að skilja smá eftir, svona fyrir veturinn).  Þoka lá yfir í fyrstu göngum hér heima sem gerði daginn frekar ævintýralegan.  Í talstöðvunum mátti oft heyra setningar  eins og "hvar er ég"? "nennir þú að hóa svo ég viti hvar þú ert" og svo framvegis. Í lok dags töldum við okkur þó góð og héldum að nánast ekkert fé hefði orðið eftir.  En morguninn eftir voru hvítir deplar upp um allt fjall svo þónokkrar náðu að snúa á okkur í þokunni. 
Kíkið inn á sauðfé til að sjá myndir. 


26.08.2010

Hann Stígur okkar komst nú loksins í dóm í síðustu viku.  Stígur er 5 vetra undan Hágangi frá Narfastöðum og Gullinstjörnu frá Akureyri.  Stígur er stór og fallegur, enda fékk hann 8,21 í byggingu, og fljúgandi reiðhestur með góðan vilja.  Við vorum bara sátt við dóminn á honum og þið getið séð dóminn hér en hann hlaut m.a. 8,5 fyrir tölt.


14.08.2010


Versló 2010!!


12.08.2010


Það fór þó ekki svo að fjölskyldan næði ekki einu hestamóti í sumar.  Við drifum okkur í Einarsstaði í Reykjadal um síðustu helgi og skemmtum okkur vel í góðra vina hópi.  Sigmundur Sigurjónsson flutti hrossin fyrir okkur á sérútbúnum hestaflutningabíl sem hann á og fór hann með yfir 20 hross fyrir okkur og nágranna okkar.  Þar var síðan keppt í öllum greinum, grillað, riðið út og drukkinn smá bjór auðvitað!!!  Allir voru sáttir við sitt og voru riðin nokkur úrslit á sunnudeginum.  Þór varð í öðru sæti í 100 m. skeiði á Demanti frá Litla Dunhaga.  En annað hvort hefur Demantur farið of hratt fyrir myndavélina eða húsmóðirin verið of dolfallin við að horfa á bóndann fljúga framhjá, allavega náði hún þeim ekki á mynd.  Eyrún þreytti frumraun sína í skeiðkappreiðum á Seif frá Skriðu.  Gamli skeiðaði flott hjá henni annan sprettinn og var hún því að vonum ánægð.  Á fyrstu myndinni eru Þór og Dalrós í B- úrslitum í B flokki, svo Björgvin Helgason á Birtu frá Skriðu.  Björgvin er að temja hjá okkur núna ásamt Eyrúnu og gengur alveg glimrandi vel.  Honum gekk vel og endaði minnir mig nr. 4 í unglingaflokki á henni Birtu okkar sem er bara 5 vetra gömul.  Svo er Agnar á Þotu frá Hrafnagili, svo Eyrún á Sól og  Svo Egill, Jónsteinn og Oddrún í miðnæturreiðtúr.  Egill á Gullbrá og Svo Eyrún á flugskeiði. 


02.08.2010

Brunuðum eitt kvöldið út í Kjarna í fyrrverandi Arnarneshreppi og sóttum Stíg en hann var í merum þar hjá þeim hjónum Davíð og Sigrúnu.  Nú er hann komin á járn á nýjan leik og vonandi tekst að sýna hann í haust.  Það átti að sýna hann í vor en hann hóstaði og hóstaði svo nú krossum við fingur um að hann sé orðin heill heilsu á ný.  Erum með ungfolana okkar hjá þeim líka í hólfi og kíktum á  þá í leiðinni.  Þeir voru vel feitir og pattaralegir enda allt á kafi í grasi í hólfinu hjá þeim.  Ekki amalegt það.  Veðrið var yndilegt og kvelsólin skein og Egill Már notaði tækifærið til að klappa köppunum aðeins.  En það eru þeir Skjálti og Dynur sem eru svona forvitnir. 



28.07.2010

Sumarið líður hratt eins og sést á honum Klók, gæsarunganum okkar sem var svo lítill og sætur bara rétt um daginn, en er nú að verða heljarinnar gæs sem skilur eftir sig heljarinnar úrgang á bæjarhlaðinu.  Gæsirnar kjósa helst að liggja við þvottahúshurðina enda vita þær að þar er mesti umgangurinn og mesta fjörið.  Hann Atli vinnumaður er síðan að sóla sig í blíðunni á meðan hann talar í símann, en það er nú sem betur fer ekki það eina sem hann gerir í sveitinni, enda hörkuduglegur, ungur drengur þar á ferð og vel upp alinn, Guðmundur.  Við biðjum að heilsa út á ballarhaf!!!!


23.07.2010

Þarna eru tveir gamlir snillingar á ferð en það eru þeir Grettir (25 vetra) og Snerill (?).  Þeirra aðalhlutverk er að skemmta krökkunum.  Þeir eru notaðir til að æfa sig í að stökkva á bak berbakt, sækja kýrnar og fleira. Á baki eru Egill Már, Ragnheiður Fjóla og Ólöf Rún.  Það eru svo Ragnheiður Sverrisd. og Stella sem reka lestina.


22.07.2010


Vorum í "hestaferð" í síðustu viku.  Þetta var svona öðruvísi hestaferð þar sem við ferðuðumst milli mjalta og sváfum heima.  Margir kostir við það, þurftum ekki afleysingu í fjósið, enginn farangur og ekkert vesen.  Við fórum fram í eyjafjarðarsveit og þvældumst eitthvað um.  Þannig að hrossin eru nú komin í ágætisform og allt á uppleið.  Við eigum núna þónokkra unga og mjög efnilega fola til sölu.  Til stendur að mynda þá og auglýsa sem fyrst eða um leið og tími gefst til.  Það er bara ekki alveg nóg til af honum á þessum árstíma!!! 
Annars er þetta dagurinn sem við kláruðum að slá fyrrislátt og hófum þann seinni.  þannig að það er engin pása milli slátta´í ár.  Allt stefnir í met í heyfeng svo ekki þarf að óttast heyleysi næsta vetur. 


08.07.2010



Nú er rigningatíð í Hörgárdalnum og því pása í heyskap í bili.  Við, sem vorum búin að grátbiðja um rigningu, erum farin að bíða eftir að stytti upp svo hægt sé að klára fyrri slátt.  En við erum þó að nota rigningadagana í allt það sem ekki er tími til að gera í þurrki.  Svo sem að járna, þrífa til, keyra rúllur og seinast en ekki síst ríða út.   Drifum okkur í Baugasel einn daginn með góðum vinum og grilluðum læri í jörðu.  Með í för voru einnig mamma og systir Malinar þær Aníta og Anna frá Svíþjóð.  Þær ætluðu á landsmót og þar sem þær voru búnar að kaupa miða komu þær bara samt í heimsókn.  Þær fóru svo út í dag og Malin með þeim.  En hún er búin að vera að vinna hjá okkur í eitt og hálft ár og búin að standa sig mjög vel.  Takk Malin fyrir allt!!!  Gleðifréttin er sú að hún ætlar líklega að koma aftur um áramót og temja hjá okkur næsta vetur. 


28.06.2010

Veðrið undanfarið er búið að vera frábært, enda búið að vera allt að fullu í heyskap hér í sveitinni.  Sólin hefur ekkert verið að spara sig og litbrigðin á nóttunni frábær eins og þessar myndir sýna.  Svo frábær að það er erfitt að hafa sig í það að sofa eitthvað.  Manni finnst maður alltaf vera að missa af einhverju!!!!  Sigga og krakkarnir brugðu sér í borgina um helgina um  háskaðræðistímann eins og frægur maður sagði eitt sinn.  Þau fóru í frábært brúðkaup, svömluðu í Nauthólsvíkinni, borðuðu á "fabrikkunni" og margt fleira.  Malin og Eyrún eru alltaf að temja eitthvað, við höfum sloppið nokkuð vel við þessa hestapesti 7,9,13!!!  aðeins fáein hross sýnt einhver smá einkenni og þá farið í frí með það sama. 


17.06.2010

Hæ hó jibbíjeiogjibbíijei!!!! Gleðilega þjóðhátíð


16.06.2010


Þetta hestfolald er undan Rauðhettu frá Haga og Roða frá Múla og hefur hann hlotið nafnið Breki frá Skriðu.  Hann fer bara um á tölti með flottum fótaburði og "á" að verða framtíðarreiðhestur húsmóðurinnar á bænum.  Enda hafði Breki mikinn áhuga á henni þar sem hún lá á jörðinni með myndavélina að vopni og mömmu gömlu þótti líka vissara að vita hvað sá stutti væri að skoða!!! Á síðustu myndinni er hann svo að kljást við hana Svás. 
 

14.06.2010

Þetta er fjörkálfurinn hún Svás (Jónsdóttir og Sunnu), hún er mjög fjörug og forvitin og eins og sjá má á myndunum efnileg í hindrunarstökki, auk þess sem hún rúllar um á öllum gangi og tekur vel á því í skeiðsprettunum þó hún sé ekki gömul.

14.06.2010


Moli virðist bara vera að "Fíla" sig vel í Noregi hjá eiganda sínum Kine Nordbrekkan.  Hann er nú í hólfi með merum og af myndunum að dæma hefur hann engu gleymt karlinn.  En þessar myndir fékk ég að láni hjá henni Kine.  Klikkið á þær til að sjá þær stærri. 


08.06.2010

Það fæðast ekki bara folöld út í haganum þessa dagana.  Hún Alfa bar óvænt suður í hólfi í nótt og eignaðist þetta litfagra naut.  Alfa er mikil mamma og passaði litla guttann vel enda gekk ekki alvega áfallalaust að koma þeim í hús en það tókst eftir smá eltingaleik. 

06.06.2010

Kýrnar fóru loksins út í dag  og var fjör í þeim að vanda.  Margmenni var við athöfnina og allir skemmtu sér vel.  Hún Blesa gamla er orðin frekar þreytt og sigin og fékk  því að vera á blettinum fyrir framan fjósið ásamt nokkrum veikburða vinkonum sínum!!.


02.06.2010

 Það voru mikil vonbrigði að sjá brúnt folald koma í heiminn snemma á föstudagsmorgun og meira að segja hestfolald.  En það var búið að panta moldótta meri úr  úr henni Drottningu.  Faðirinn er Kopar frá Hvanneyri, jarpur Þorrasonur, sem við eigum með Jóni Páli og Jónínu.  Reiknilíkön voru búin að segja til um 80 % líkur á moldóttu/leirljósu og ekki átti að vera nema kanski 2 % líkur á brúnu en svo kom brúnt.  En strax og hann stóð á fætur máttum við bíta í tunguna á okkur því þó hann sé "bara brúnstjörnóttur"  er hann án efa það fallegasta folald sem við höfum átt.  Hann hefur ekki hlotið nafn ennþá, við finnum ekkert sem hæfir svona glæsipilt en það hlýtur að koma fljótlega. 


Þessi litla dama kom svo í morgun, hún er undan honum Mola okkar og Pílu frá Hólkoti.  Hún er næstsíðasta folaldið sem fæðist undan Mola hér í Skriðu og hefur hún hlotið nafnið Míla.


30.05.2010


Nú er stormasöm helgi að baki með tilheyrandi sviptingum í þjóðlífinu.  Sögulegar kosningar, sumir sáttir en aðrir ekki og svo söngvakeppnin sem við ætluðum náttúrulega að vinna eins og alltaf en gekk sem betur fer ekki eftir.  En hér á bæ féllu bæði  pólitíkin og evrovision í skuggann af þremur litlum félögum sem hafa hlotið nöfnin:  Klókur, Dúna og Svala.  Svala klaktist úr eggi heima í stofu.  Henni leiddist náttúrulega svo börnin fóru á ungaveiðar og náðu í tvo í viðbót.  Það þurfti svo að græja aðstöðu fyrir krílin svo þau geti verið úti á daginn.  En fyrst um sinn fá þau að gista í herberginu hans Agnars Páls.

Nú er skólinn búinn og voru þessar sundmyndir teknar á vorhátíð skólans á föstudaginn.  Svo eru Amma Sigurbjörg og Jónsteinn að þrífa til í blómabeðinu. 


29.05.2010

Þór sýndi 3 merar á kynbótasýningu fram á Melgerðismelum um daginn.  Það voru þær Dalrós, Birta og Hetja.  Klikkið á nöfnin til að sjá dóminn. 


28.05.2010

Það er fjölgun í fleiru en hrossum og sauðfé hér á bæ.  En á dögunum komu 4 hvítir kanínuungar, ægilega sætir hárhnoðrar.  Einn er búin að fá heimili á Rauðalæk en hinum vantar sárlega heimili.  Ef einhver hefur áhuga þá endilega sendið póst eða hringið í síma 8630057. 


26.05.2010

Það var leikur í ungfolunum núna um daginn þegar við fluttum þá á milli hólfa.  Þetta eru þeir Skjálfti  og Kjarkur (frá Skriðu báðir 2)  að fljúgast á. Slagurinn var samt bara svona  að gamni og engin slasaði sig við þetta brölt. 
  

26.05.2010
 

Jæja nú fjölgar óðum í hrossastóðinu.  Þrjú folöld fædd og allt merar.  Ekki amalegt það.  Fremst er Héla með hana Myrká sína, en Myrká er undan Ægi frá Litla-Landi.  Síðan kemur hún Sunna gamla með  hana Svás .   Svás er undan Jóni frá Sámsstöðum (undan Þoku frá Ak. og Eldjárni frá Tjaldhólum).  Síðust er svo List með nýkastað merfolald undan Tenór frá Túnsbergi.  Svás og litla Tenórsdóttirin verða vel líklega báðar gráar. 


17.05.2010
sjá  sauðfé, nokkrar nýjar myndir  úr fjárhúsunum.


12.05.2010

Þau  voru skrautleg og skemmtileg krakkarnir í Létti sem ætluðu með atriði á æskan og hesturinn á Sauðárkróki um daginn.  Sýningunni var frestað vegna flensunnar. Í staðinn var haldinn sýning í Topreiter höllinni á Akureyri og var það mjög gaman. Þau settu upp atriði um nýju fötin keisarans. Agnar og Egill voru lífverðir keisarans og voru þeir á Birtu og Hetju.  A miðju myndinni eru systurnar Þóra og Pálína Höskuldsdætur sem fóru á kostum sem hirðfífl.


09.05.2010
 
Nú er fyrsta folaldið fætt hér í Skriðu, það fæddist fyrir mánaðarmótin apríl maí.  Það er brún hryssa sem hlotið hefur nafnið Myrká.  Hún  er stór og gullfalleg undan Hélu frá Skriðu og Ægi frá Litlalandi.  Því miður náðist ekki mynd af djásninu áður en hún fylgdi móður sinni suður á land, en Héla fór undir Sædyn frá Múla og krossum við fingur og vonum að hún komi fylfull til baka.   Annars er allt á fullu, sauðburðurinn langt komin, ekki nema 20 eftir að bera.  Vonandi láta þær ekki bíða lengi eftir sér. 


27.04.2010

Nú er margt farið að minna á að sumarið sé að koma.  Það er alltaf jafn gaman þegar allt tekur við sér eftir veturinn, bæði fólk, dýr og gróður.  En þó fylgir þessum árstíma einn ókostur og það er að ekki eru nógu margir klukkutímar í hverjum sólarhring  til að gera allt sem á að gera.  En einhvern veginn hefst þetta nú alltaf alltsaman.  Sauðburðurinn fór af stað  með krafti og nú eru komin mörg lömb í húsin og svo eru farfuglarnir farnir að týnast til baka frá suðrænum slóðum.  Sem betur fer virðist askan úr Eyjafjallajökli ekki stöðva þá á sínum ferðalögum, frekar en mig.   Ég fór til Tromsö í N- Noregi að heimsækja vinkonu mína um daginn.  Það var rosalega gaman en ég stoppaði þó aðeins styttra en til stóð, þar sem við tókum fyrstu vél heim þegar tækifæri gafst út af öskunni. 



06.04.2010

Nýr á sölusíðunni er Molasonurinn Skrúður frá Skriðu!!!


04.04.2010
Um síðustu helgi var nýja reiðhöllin á Björgum vígð með viðhöfn.  Það var haldið mót og keppt var í þrígangi og skeiði.  Fjöldi manns var að keppa sem og að horfa á og var þetta rosalega skemmtilegur dagur sem endaði svo með gleðskap langt fram á nótt.  Takk fyrir okkur Bjargarbændur og búalið.  Þór og Malin voru að keppa og endaði Þór í öðru sæti í skeiði á Demanti frá Litla-Dunhaga og svo í fjórða sæti í þrígangi á Dalrós frá Arnarstöðum. 


03.04.2010

Í dag var líflandsmótið í reiðhöllinni á Akureyri, en það er mót sem æskulýðsnefnd Léttis og Lífland heldur fyrir börn og unglinga.  Þetta var flott mót og voru krakkarnir vel ríðandi.  Agnar keppti á Hetju frá Garðsá og Egill á Birtu frá Skriðu í Tölti.  Þeir stóðu sig mjög vel og höfðu gaman af.  Allir krakkarnir fengu svo páskaegg í lokin.  Við litum svo aðeins á dúfurnar hjá honum Agli Má Vignissyni á heimleiðinni og nú er spurning hversu margir dagar líða áður en það verða komnar dúfur í Skriðu ! 


22.03.2010

Nýr á sölusíðunni er Skjálfti frá Skriðu!!!  SELDUR


22.03.2010


Á miðvikudaginn síðasta var Moli kvaddur og fóru allir krakkarnir smá sprett á honum í kveðjuskyni.  Nú er Moli komin á nýja heimilið sitt í Noregi og heilsast vel eftir flugferðina að sögn núverandi eiganda hans, Kine Nordbrekken.   Hann flaug út á laugardaginn síðasta.  Moli var í þrusu stuði þegar hann fór eins og myndirnar sýna. 


09.03.2010

Hún Susanna í Lönguhlíð kom hérna við um daginn með nýju fínu myndavélina sína og smellti af nokkrum myndum af Malin og Þór.  Þór er á efnilegri 4 vetra Moladóttur sem heitir Stella og er frá Skriðu.  Stella er rosalega skemmtilegt og auðvelt tryppi og er í eigu Páls Skúlasonar frænda Siggu.  Malin er svo á honum Víkingi sínum sem er núfarin að tölta og verður rosa flottur.  Með í för eru svo Garri, Ótta og Bubbi!!!

Susanna tók einnig þessar myndir fyrir neðan en þær eru teknar á ísmótinu á Dalvík sem haldið var nú í febrúar.   Þór er á Dömu frá Arnarstöðum og Kopar frá Hvanneyri en Malin er á Hetju frá Garðsá.


23.02.2010

Nú er hann Moli okkar á leið úr landi og er hann líklega sá eini úr fjölskyldunni sem fær að fara í utanlandsferð á þessu kreppu ári.  Hann fer til Noregs núna í byrjun mars til Kine Nordbrekken og Bjørg Bystrøm .   Það verður mikill sorgardagur í Skriðu þegar hann fer enda er hann eins og Gullinstjarna mamma hans algjör sjarmör!!  En það á ekki eftir að væsa um hann hjá nýjum eigendum og óskum við þeim góðs gengis og til hamingju. 


22.02.2010

Skjótt skipast veður í lofti.  Þessar myndir eru teknar fyrir svona 10 dögum síðan, þá var veðurblíðan slík að maður hélt að það væri að koma vor. Jónsteinn fékk sér göngutúr upp í fjall með brauð handa folaldmerunum og leiddist þeim það ekki.  En nú snjóar bara og snjóar og snjóar aftur ojbjakkk. 


14.02.2010

Þetta er hún Synd okkar, en hún er undan Gullinstjörnu og Mola (sem er líka undan Gullinstjörnu). Hún ber sem sagt nafnið sitt með rentu.  Það vildi svo til að Gullinstjarna gamla var búin að fara undir eina 3 graðhesta sumarið 2006 og ekkert gekk.  Við litum svo á að sú gamla myndi  bara ekkert halda meir, væri bara ónýt, og settum hana bara með hópnum hans Molar þegar hún kom heim.  Það var eins og við manninn mælt að hún fékk í hvelli og sumarið 2007 kom hún Synd í heiminn, nákvæm eftirmynd móður sinnar enda ekki við öðru að búast.  En hún Synd slasaði sig svo aðeins um daginn, fékk líklega nagla í hófinn og var tekin inn til meðhöndlunar og er nú hin sprækasta á ný. 


13.02.2010
Eitt er það sem tekur sífelldum breytingum hér á bæ og það er hundaeignin.  Á fyrstu myndinni er nýjasti meðlimurinn í hundafjölskyldunni okkar.  Hún er frá Birni Jóhanni og Kiddu í Hólakoti á Reykjaströnd og heitir Æsa.  Hún er, eins og hinir, hreinræktaður Border collie en sérstök á litinn.  En fyrir áttum við þau Óttu og Garra.  Ótta er frá Lönguhlíð en Garri heimaræktaður og faðir bæði Óttu og  Æsu.  Hinar myndirnar eru svo af vinnuglöðum karlmönnum að þrífa hesthúsið!!!! 


24.01 2010

Það er vor í lofti í byrjun Þorra og ætlar hann "vonandi" að fara mildum höndum um okkur í ár.  Veðrið um helgina var frábært og börnin héldu í alvöru að það væri að koma sumar og voru eins og kálfar sem sleppa út að vori.  Við notuðum veðurblíðuna og fórum í góðan reiðtúr og leyfðum hrossunum að hlaupa aðeins úr sér.  Á myndunum er Egill á Birtu og Gleði, en þær eru báðar undan Mola.  Birta (sú blesótta) er á 5. vetur og er með eindæmun skapgóð og þæg hryssa.  Gleði er svo frá Höfða í Grýtubakkahreppi.  Hún er á 4. vetur og er Malin að temja hana núna. 



18.01 2010

Við eigum nú þrjú ný merfolöld undan Stíg frá Skriðu.  Þær Öldu frá Brimnesi (sú jarpa), Kringlu frá Steinstöðum (Sú rauðgráa) og Gloppu frá Steinstöðum.  Þær eru allar gæfar og rólegar sérstaklega Kringla sem er algjör dekurrófa.  Alda og Gloppa komust báðar í úrslit á folaldasýningunni en Kringla var heima þar sem hún hefur meiri áhuga á að láta klappa sér en að láta reka sig til með öðrum hrossum!!


18.01.2010



Á laugardaginn síðasta fór fram árleg folaldasýning Framfara og var hún haldin í nýrri og glæsilegri reiðhöll á Björgum í Hörgárdal (sjá heimasíðu www.bjorg1.is ).  Við fórum með hóp af folöldum á sýninguna og vorum bara nokkuð ánægð  með  hópinn.  Í hópi 8 efstu meranna áttum við Sóldögg frá Skriðu, svartskjótta Mola og Listar dóttur, og endaði hún í öðru sæti. Sóldögg er algjör töltmilla með mikinn fótaburð. Svo voru þar einnig Lilja frá Skriðu (Geisla og Freyjudóttir), Gloppa frá Steinstöðum (Stígsdóttir) og Alda frá Brimnesi (einnig Stígsdóttir).  Í hópi hestfolalda í undanúrslitum áttum við svo Svarta-Örn frá Litla-Dunhaga en hann er Molasonur sem Þór á í félagi með Jósavini Gunnarssyni í Litla-Dunhaga. Gustur frá Skriðu var svo í þriðja sæti en hann er undan Geisla frá Úlfstöðum og Kolbrúnu frá Skriðu og er í eigu Davíðs bróður Siggu.  Fínn dagur, fullt af fólki og toppaðstaða.  Efsta hestfolaldið var frá Möðurfelli og efsta merfolaldið frá Ytra-Brekkukoti og óskum við eigendum þeirra til hamingju. 


05.01.2010

Nú er vetur í bæ og allt á kafi í snjó.  Frostið bítur í kinnarnar en birtan úti er ótrúlega falleg allan sólarhringinn.   Nú eru öll hross komin á gjöf og erum við búin að vera að safna þeim saman undanfarið.  Búið er að sækja tryppinn fram á Barkárdal og var það ævintýraferð.  Þór fékk nokkra góða menn með sér á snjósleðum til að sækja þau og þurftu þeir að leita nokkuð lengi og viða af þeim og fundu þau svo að lokum fram á Myrkárdal.  Það var komið myrkur þegar þau loksins komust í skjól.   Við hjónin örkuðum hér upp í fjall á annan í jólum að sækja hrossin sem voru þar.  Á miðri leið brast á með skafrenningi og látum en við komumst fyrir rest með hrossin heim að bæ, en vorum orðin bæði þreytt og kalt.  Þannig að þetta hefur nú ekkert allt gengið alveg smurt.  Hesthúsið er nú að fyllast af hrossum og allt að fara á fullt í hestamennskunni.  Malin tamnigakonan kemur heim frá Svíþjóð eftir 10 daga og þá þarf allt að vera klárt svo hún geti hellt sér í tamningar. 
Á myndunum eru Egill og Stör.  Stör er undan Stíg okkar og Hélu frá Skriðu.  Hún er algjör kelurófa og veit ekkert betra en að fá klapp.  Þannig er reyndar með flest folöldin undan Stíg enda var hann svona sjálfur.  Síðan eru Egill og Eyrún að fara með Hetju og Birtu í hús enda haustorlofið búið hjá þeim.  Kíkið inn á kýr og sjáið myndir af flottum jólakálfi!!


04.01.2010

Gleðilegt ár allir saman og takk fyrir það gamla. 


26.12.2009

Það eru hvít jól í ár, það einfaldlega snjóar og snjóar og snjóar meira og svo aðeins meira.  Núna er meira að segja komið rok líka svo það sést ekki út úr augum.  Þeir sem lágu á bæn um hvít jól hafa allavega verið bænheyrðir!!!!!


24.12.2009



12.12.2009

Héðan  er nú allt fínt að frétta,það hefur verið alveg frábært reiðfæri undanfarið, ís yfir allan veginn (ekki eins gaman að keyra bíl og að ríða út).  En nú er 10 stiga hiti og allt svell farið.  Alveg yndislegt veður en rosalegt myrkur þar sem enginn er snjórinn til að lýsa upp skammdegið.  En þá er bara að hengja upp fleiri jólaseríur!!!!!  Árlegri barnaafmælishrinu er nú einnig lokið með tilheyrandi fjöri og sælgætisáti og allt að falla í ró og spekt á ný.  500 laufabrauðskökur voru flattar út á eldhúsbekknum í Skriðu í gær og í dag svo við erum einnig að undirbúa komu jólanna eins og aðrir landsmenn.  En þeir Faxi, Grettir og Seifur hafa ekki minnsta áhuga á jólunum, heldur njóta bara lífsins í heldri-hesta-hólfinu, lausir við allar heimsins áhyggjur. 


10.12.2009

Nú er búið að uppfæra aðeins sölusíðuna og nýr hestur á henni er graðhesturinn Geisli frá Úlfstöðum.  Geisli er með fyrstu verðlaun og er frábær fjórgangari.  Kíkið á hross til sölu.


01.12.2009
Í sumar var hún Natalie frá Svíþjóð hjá okkur í nokkrar vikur.  Hún er í Íslandshestaskóla út í Svíþjóð og kom í verknám til okkar.  Hún tók margar skemmtilegar myndir meðan hún var hér.  Ýtið hér til að skoða nokkrar þeirra


29.11.2009

Tveir snillingar á ferð í dag Egill Már (7ára) og Moli (8 ára).  Það fór vel á með þeim eins og áður og brosti sá yngri í tvo hringi eftir reiðtúrinn.


29.11.2009

Þetta er hún Rimma frá Ytri-Bægisá, Rimma er undan Mætti frá Ytri-Hofdölum og Kleópötru frá Skriðu.  Kleópatra var undan Sindra frá Kirkjubæ, "fermingargjöfinni hennar Siggu".  Sindri var mikill skeiðhestur  og var felldur vorið 2007.  Haukur Sigfússon á Bægisá gaf Siggu þessa meri nú í haust, og er hún eini afkomandi Sindra hér á landi.  Rimma er hágeng og þæg meri og ekki skemmir nú liturinn fyrir henni. 


20.11.2009
Kíkið á hvaða merar fóru undir hvaða hesta sumarið 2009!!  Fyljunarlisti 2009


20.11.2009

Í nógu er að snúast þessa dagana, sem og aðra.  Malin er á fullu í tamningum og á myndinni er hún með Moladóttir sem er ný komin til okkar í tamningu.  En hún er frá Litla-Dunhaga og í eigu Jósavins Gunnarssonar.  Nú er verið að brasa í að draga undan og sleppa hrossum og járna ný, rýja kindur, keyra skít og svo framvegis.  Kindurnar eru nú allar klipptar og komnar í hús og á fyrstu myndinni er Friðjón að ganga frá ullar sekkjunum.  Ullina þarf að flokka eftir lit og gæðum , vigta þarf sekkina og merkja vel áður en ullin er send til vinnslu. 


12.11.2009

Nú á loksins eitthvað að fara að gerast í hrossasölu á bænum, Tvær nýjar merar á sölusíðunni og fleiri hross á leiðinni næstu daga.  Þetta eru þær Sól og Dama frá Arnarstöðum.  Sól er undan Mola frá Skriðu og Dama undan Koðrán frá Kommu.  Endilega kíkið á Hross til sölu og sjáið video af merunum.  Húsmóðirin gerist æ tæknivæddari reyndar með dyggri aðstoð frá tamningakonunni. Húrra fyrir því og eigið öll góða daga!!! 


08.11.2009

Nú er jólahangikjötið klárt fyrir þetta ár, ekkert kemur manni í meira jólaskap en ilmurinn af nýreyktu  hangikjötinu og best er að skera sér væna sneið  af því um leið og það er sagað ummmmmmmmmmm.


26.10.2009


Hér eru myndir af 5 afkvæmum Mola sem við erum búin að temja, þau eru Sól frá Arnarstöðum á fyrstu myndinni, svo Björg frá Björgum í eigu Vidda og Ollu á Björgum (www.bjorg1.is)  , þá Dalrós frá Arnarstöðum, Birta frá Skriðu og Tvistur frá Arnarstöðum.  Rauðskjótta merin heitir svo Fiðla frá Skriðu og er hún nú komin á hús og búið að setja á hana hnakk.  Hún er að koma inn á fjórða vetur núna og er mjög þæg og spennandi.  Malin tamningakonan okkar er nú alveg á fullu í frumtamningum og gengur það bara ljómandi vel hjá henni, enda er hún Malin með eindæmum róleg og yfirveguð og hefur lag á að róa tryppin. 


21.10.2009

Eins og alltaf var haldin hrútasýning hér í sveit á haustdögum.  Að þessu sinni var hún haldin í Garðshorni og kom þangað hópur af fólki og enn stærri hópur af hrútum.  Við fórum með feðgana Fálka og Ás.  Fálki varð annar í hópi veturgamalla hrúta á eftir stórstirninu Lambás frá Sveinungsvík.  Ás er lambhrútur og lenti hann í 2-3 sæti í lamhrútahópnum.  Það er gaman að segja frá því að Ás er undan Fálka og ennig lambhrúturinn sem stóð efstur, en hann er frá Lönguhlíð (skýrir sælubrosið á Braga bónda).  Það var hún Eva María í Lönguhlíð sem tók þessar myndir.


14.10.2009

Fór og leit á folaldsmerarnar í fjallinu í dag og voru þær feitar og pattaralegar.  "Vildi að það þætti einnig kostur við mömmur að vera taldar feitar og pattaralegar" en það er nú önnur saga.  Ég smellti af þessum skemmtilegu myndum og er það hann Skrúður Molasonur sem sefur svona fast.  Kíkið inn á hross/unghross og skoðið folöldin okkar frá því í vor


13.10.2009

Kíkið á hross til sölu.  Þar er nýr foli, Djákni frá Skriðu, veturgamall og ógeltur undan Mola.


29.09.2009

Ferð á Strandir!!  Ýtið hér til að sjá myndir.


29.09.2009

Nú eru haustverkin að hefjast fyrir alvöru.  Búið að þreskja kornið og heyskapurinn kláraðist loksins í dag.  Það var gott að það hafðist fyrir mánaðarmótin!!!  Það var ekki mikil uppskera af korninu í ár,  akurinn var á mjög rýrum og grýttum jarðvegi, svo það fór illa í þurrkunum í sumar.  Við fengum þó  slatta sem endist eitthvað fram á veturinn.  Við völsum og sýrum kornið með propionsýru og geymum það í fiskikerjum.  Kýrnar eru alveg vitlausar í það og vonandi mjólka þær vel af því líka. 


28.09.2009

Hér koma nokkrar myndir frá réttunum í ár.  Eins og vanalega var frábært veður, 16 stiga hiti og sól, og kindurnar latar eftir því.  Það gekk samt vel að smala og heimturnar voru góðar.  Margt var um manninn og mikið fjör hjá yngri kynslóðinni við að draga.  Við hjónin erum búin að fara í nokkrar göngur í ár, þannig að gönguformið er bara orðið nokkuð gott.  Fyri utan okkar eigið gangnasvæði fórum við á Grjótárdal fyrir Sigurð á Staðarbakka og svo göngum við Barkárdalinn og Sörlatungudalinn fyrir Þúfnavelli. 


15.09.2009

Tíminn flýgur hjá og allt í einu kominn miður september og fyrstu göngur búnar.   Nú er búið að sónarskoða merarnar sem voru hjá Mola og voru  þær sem betur fer flestar fylfullar.  Þó er hann enn með nokkrum merum sem komu seint í hólfið þannig að vertíðinni hans er ekki alveg lokið ennþá.  Það er hún Elfa Ágústsdóttir dýralæknir á Akureyri sem sónarskoðar alltaf hópinn fyrir okkur.  Einnig eru þeir Stígur  frá Skriðu  og Geisli frá Úlfstöðum búnir að gagnast þónokkrum merum í sumar. 


25.08.2009

Hún Birta Moladóttir var sýnd í kynbótadómi í síðustu viku.  Birta er 4. vetra undan Mola og Frigg frá Brún. Birta er rosalega geðgóð og frábærlega skemmtilegt tryppi.  Hún er lítið farin að skeiða ennþá en á mikið inni.  Hún hlaut 7.90 í byggingu sem skiptist svona: 7,5- 8,5-8-8-7,5-7-8-7.  Fyrir hæfileika fékk hún svo  7,5-8-5,5-7,5-8-7,5-8 sem gerir 7,38   Aðaleinkunn  7,59.  


20.08.2009

Við erum búin að bralla ýmislegt skemmtilegt í sumar, við brugðum okkur til dæmis á Barðastönd um daginn að heimsækja vinafólk okkar á Brjánslæk.  Þar var mikið fjör enda ekki við öðru að búast þegar tvær barnmargar fjölskyldur koma saman.  Það jafnast ekki margt á við stöndina þarna fyrir vestan, sannkallaður sólstrandarfílingur.  Svo var bara hægt að skola saltið af sér í læk skammt frá, þar sem myndaðist þessi fína "kalda" sturta. 


Svo fór Sigga með Línu og co í frábæra ferð út í Drangey að skoða lunda, álkur, seli, höfrunga og kletta.  Það er frábært að vera túristi á Íslandi!!


Sörlastaðir eru eyðibýli í Fnjóskadal sem hestamenn hafa til afnota.  Þangað er alltaf jafn gott að koma, frábærar reiðleiðir til allra átta en stundum svolítið mikið af mýflugu.  Þessar myndir voru teknar þar í sumar.


19.08.2009

Þessar skemmtilegu myndir voru teknar í lok júní, þegar við rákum tryppin okkar fram á Barkárdal.  En þar verða þau eitthvað fram eftir hausti.  Á fyrstu myndinni eru heiðurshjónin Elvar Reykjalín og Guðlaug frá Hauganesi.  Á annari myndinni eru þeir Björn og Atli, greinilega búnir á því  eftir þrælkunina í Skriðu, á þriðju myndinni eru þeir bræður Agnar og Egill "í loftinu" og svo sést ógreinilega yfir tryppahópinn sem skilinn var eftir á dalnum. 
 

27.07.2009
 

Um helgina vorum við á æskulýðsmóti Norðulands á Melgerðismelum.  Það er barna og unglingamót sem Léttir og Funi standa fyrir.  Þetta var rosalega fjölbreytt og skemmtilegt mót þar sem leikgleðin er höfð að leiðarljósi.  Ratleikir, þrautabraut, reiðtúr og létt keppni.   Krakkarnir okkar tóku öll þátt og höfðu gaman af.  Við lentum í allskyns ævintýrum og lentum til dæmis´í skaðræðis hagléli í reiðtúrnum og svo helli rigningu þar á eftir.  Allir urðu rennandi blautir og því ákveðið að skella sér bara í Djúpadalsána og var hún þrædd fram og til baka með tilheyrandi buslugangi. 
Á morgun er svo stefnan tekin á Sörlastaði í 3. daga hestaferð og ef eitthvað er að marka skeytin verður sú ferð einnig blaut en enginn er verri þó hann vökni!!

17.07.2009

Meira um fjallgöngur!!  Dellurnar fóru í sína árlegu stórgöngu á miðvikudaginn var.  Fyrir tveimur árum gengum við Þorvaldsdalinn og í fyrra gengum við yfir Heljardalsheiði.  Í ár var gengið frá Staðarbakka og fram Hörgárdalinn, gegnum Sandárdal og niður í Myrkárdal og komið niður hjá Myrká.   Við lentum í svartaþoku en römbuðum þó á rétta leið og skiluðum okkur allar til byggða.  Þetta var 26 km. ganga og skemmtum við okkur konunglega.  Enduðum svo í pottinum á Þeló og í kínamat í Litlu-Brekku.  Það var hún Halla Björk Þorláksdóttir frá Baldursheimi sem tók þessar myndir, önnur af öllum hópnum og hin af Jónínu í Litlu-Brekku og Huldu í Litla-Dunhaga (sem á einmitt afmæli í dag). 


14.07.2009

Þór tók þátt í landsmóti UMFÍ sem fór fram á Akureyri í blíðskaparveðri um síðustu helgi.  Hann keppti fyrir UMSE og halaði inn þónokkrum stigum fyrir félagið.  Hann keppti á Geisla frá Úlfstöðum í fjórgangi og lenti í öðru sæti, Seif í fimmgang (3. sæti) og gæðingaskeiði (4. sæti) og svo á Hákon í tölti.  Þór keppti einnig í starfshlaupi sem fór fram í nýjum og stórglæsilegum frjálsíþróttavelli bæjarins.  Hann kom öllum á óvart og lenti í 4 sæti þar.  Í starfshlaupinu þurfti hann, auk þess að hlaupa auðvitað, meðal annars að lesa ljóð, þekkja fisktegundir, meta lambskrokka, borða ís og harðfisk, meta stærð og þyngd góðra manna og svo framvegis.  Þetta var frábær skemmtun eins og allt á þessu vel heppnaða landmóti.  


14.07.2009
    
Nú er orðið verulega langt síðan eitthvað hefur komið inn á heimasíðuna.  Enda kominn mánuður af endalausri blíðu og önnum.  í dag rignir svo loksins var sest aðeins við tölvuna!!  Nú er fyrri slætti næstum lokið, kindurnar allar löngu komnar á fjall, nema þessar 10 sem koma alltaf aftur!!  Moli komin að sunnan og í hólf, Stígur yngi bróðir hans komin í hólf vestur í Húnavatnssýslu.  Flest öll folöldin fædd, tryppin komin fram á Barkárdal og kýrnar mjólka eins og vanalega.  Björn verknemi er horfin til síns heima og Jóhannes Gunnar tekinn við í sumarfríinu sínu.  Einnig er hérna hjá okkur 15 ára strákur frá Akureyri sem heitir Atli.   Malin tamnigakonan okkar er nýkomin úr fríi í Svíþjóð og hún og Eyrún komnar með fullt af tryppum til að temja. Svo allt er í fullum gangi í sveitinni eins og vanalega.   Þess á milli hefur húsbóndinn aðeins skroppið í tófur og húsmóðirin í fjallgöngur.  Við hjónakornin tókum okkur til eitt kvöldið og hlupum í gegn um Þorvaldsdal, í keppni við tímann.  Vorum 3 og hálfan tíma og vorum bara ánægð með okkur þangað til við vöknuðum daginn eftir.  En ekki orð um það meir. Meðfylgjandi eru svo bara nokkrar myndir með til gamans.  Agnar er þarna á nýja hestinum sínum, honum Glæsi.  En við fengum hann ásamt annari meri austan úr þingeyjarsýslu handa strákunum að ríða á. 
  

 
10.06.2009

Nýr hestur á sölusíðunni, það er hann Hómer frá Húsavík.

 
05.06.2009

Hún Eyrún var fermd núna 31. maí í Möðruvallakirkju og svo var grillveisla á Melum á eftir.  Dagurinn var fínn, nóg að borða og sólskinsveður. Sjáið fleiri myndir af Eyrúnu með því að klikka hér.


04.06.2009

Kýrnar áttu svona dekurdag um daginn eins og er svo mikið í tísku núna.  Þær fengu fótsnyrtingu, klaufir klipptar, snyrtar og pússaðar.  Þær virtust ekkert kunna að meta þetta dekur og voru mjög fegnar þegar þær sluppu úr meðferðinni.  Það var hann Egill Már sem ljósmyndaði viðburðinn.


Svo fengum við líka skemmtilega heimsókn um daginn en það hópur af litlum krökkum sem kom að skoða lömbin og öll hin dýrin í sveitinni.


25.05.2009

Nóg er búið að vera að gerast í hestamennskunni undanfarið.  Opna Norðurlandsmótið í hestaíþróttum, firmakeppni Léttis, berbaktreiðin og Goðamótið allt í einni bunu.   Meðfylgjandi eru svipmyndir frá mótunum.  Sjá má fullt af myndum og öll úrslit inn á www.lettir.is .  Þó vantar enn myndir af Goðamótinu, það er krakka og unglingamót sem haldið var í reiðhöllinni á laugardaginn síðasta.  Þar kepptu öll börnin og stóðu sig vel.  Hann Jónsteinn Helgi (4 ára) tók ekki annað í mál en að keppa á sínum hesti í teymingaflokk, henni Birtu Moladóttir sem er líka 4 ára.  Þau voru flott saman og eiga vonandi eftir að fara marga hringi saman í framtíðinni.  Agnar keppti á Vöku og Egill á Snerli.  Eyrún keppti á Geisla frá Úlfstöðum og lenti í öðru sæti í fjórgangi og fetaði þar í fótspor föður síns.  En hann endaði einnig í öðru sæti á Geisla á opna norðurlandsmótinu og einnig í firmakeppninni.   Berbaktsreiðin var hin mesta skemmtun, en Þór, Sigga og Björn (verknemi frá Hvanneyri) vippuðu sér öll á bak og tóku þátt.  
 

19.05.2009



Þetta eru nú tveir nýjustu gullmolarnir á bænum, bæði undan Mola okkar.  Í efstu röðinni er hún List frá Fellskoti með litla spegilmynd af sjálfri sér sem hefur ekki hlotið nafn ennþá.  Ægilega grannbyggt og gæalegt merfolald.  Svo er það hann Skúmur töffari undan Svölu.     Skúmur er eins og sjá má mjög sperrtur og fjörugur kappi.  Það var hún Anna Guðrún sem tók þessar frábæru myndir.   List er svo á leiðinni suður á land að hitta hann Álf frá Selfossi svo vonandi kemur önnur skjótt meri að ári. 


18.05.2009

Nýtt hross á sölusíðunni.  Hylling frá Skriðu. 


17.05.2009

Alltaf dettur manni nú eitthvað í hug.  Ég dreif mig í BOOT CAMP fyrir nokkrum vikum síðan og hef rosalega gaman af, mæli með því fyrir alla sem hafa gaman af púla og vera pínu "vondir" við sjálfan sig.  Ég var ekki búin að vera nema 2 vikur í þjálfun þegar ég var búin að samþykkja að vera með í liðakeppni í þrekmeistarnum, en mótið fór fram í íþróttahöllinni á Akureyri.  Keppendur voru allstaðar að af landinu og 13 lið skráð til leiks í kvennaflokki.  Við komum okkur og öðrum á óvart og lentum í 3 sæti og komumst því á verðlaunapall, dálítið var nú búið að gera grín af mér fyrir keppnina en sá hlær best sem síðast hlær. Frá vinstri eru Sandra, þá Íris, svo Guðrún, ég og Emma.   Þetta sama kvöld fór svo fram kvennatölt með kántrý þema  í reiðhöllinna í Akureyri.   Ég tók þátt í dulargervi Dolly Parton.  Frábært kvöld og fullt af myndum frá töltinu eru á www.lettir.is.  Á myndinni er hún Lina okkar Eriksson sem var einu sinni tamningakona hjá okkur.  Hún er óneitanlega ótrúlega hugmyndarík enda átti hún búning kvöldsins skuldlaust. 


07.05.2009

Þór fór með Mola suður í dag.  Hann verður í húsnotkun í Fellskoti í Biskupstungum í vor. Ýtið á 2009 til að fá allar upplýsingar um notkun 2009. 

Nú eru hryssurnar farnar að kasta.  Héla kastaði rauðstjörnóttri hryssu nýlega sem er undan Stíg frá Skriðu, Hún hlaut nafnið Stör. Á fyrstu 2 myndunum er Stör en á þeirri síðustu er svo Stígur sjálfur sem folald.  Eins og sjá má eru þau svolítið lík !!
 

Héla og Stör fengu svo að fljóta með suður og fór Héla undir Ægir frá Litlalandi og verður spennandi að vita hvernig það verður. 


05.2009

Æskan og hesturinn fór fram í reiðhöllinni á Akureyri í laugardaginn og var það frábær skemmtun fyrir alla fjölskilduna. Atriðin voru fjölbreytt og skemmtileg.  Margir með flotta búninga, þarna voru prinsar og prinsessur, kúrekar, mjallhvít og dvergarnir, kardemommubærinn, huldufólk, gamli tíminn sýndur og margt fleira.  En það eru börn og unglingar frá hestamannafélögum af öllu norðurlandi sem sýna á sýningunni.  www.lettir.is myndasíða, þar eru fullt af myndum af sýningunni. 


03.05.2009

Úrslitakvöldið í KEA mótaröðinni var síðasta vetrardag. Þór varð efstur í samanlagðri stigasöfnun eftir allt mótið og kom því heim með nokkur verðlaun í safnið.  Sjá www.lettir.is myndasíða, þar eru fullt af myndum frá keppninni og einnig frá sýningunni fákar og fjör.


27.04.2009

Langt síðan ég settist niður og skrifaði einhverjar fréttir síðast en betra er seint en aldrei.  Nú er vorið held ég bara komið, veðrið frábært, lömbin farin að kíkja í heiminn og manni farið að líða eins og maður þurfi að gera allt í einu og viti ekki á hverju sé best að byrja. Þó er alltaf smá tími fyrir hestamennskuna.  Laugardaginn 18. apríl var reiðhöllin á Akureyri (Topreiterhöllin) formlega vígð með stórsýningu í höllinni.  Atriðin voru mörg og hvert öðru glæsilegra og skemmtilegra.  Við hjónin vorum með í atriðinu "fjörtök í hjónabandi" ásamt heiðurshjónunum "Guðmundi og Helgu",  og "Ólafi og Önnu Katarínu".  Ég held að þetta hafi bara gengið vel hjá okkur allavega skemmtum við okkur ágætlega.  Eyrún var svo með unglingunum í upphafsatriðinu á Geisla frá Úlfstöðum.  Geisli kunni ekki að meta klappið og fagnaðarlætin í höllinni og varð hálfhræddur en Eyrúnu tókst að róa hann niður og þá gekk þetta bara vel.  Á síðustu myndinni eru svo börnin, þar á meðal Egill, að koma með hnakka sem Topreiter gaf hestamannafélaginu. 


15.04.2009

Síðasta laugardag var haldið mót fyrir börn og unglinga í reiðhöllinni á Akureyri.  Keppt var í tölti í barnaflokk og í tölti og fjórgangi í unglinga og ungmennaflokk.  Agnar og Egill kepptu í barnaflokki og stóðu sig vel.  Eyrún keppti bæði í tölti og fjórgangi á Gusti og stóð sig einnig vel að vanda.  Hún vann fjórganginn en komst ekki í úrslit í tölti.   Þetta var skemmtilegt mót, lífland gaf verðlaunagripina en einnig fengu allir keppendur páskaegg. 


11.04.2009

Gleðilega páska!!  Hún Alexía Bartolozzi, frænka okkar, hefur rosalega gaman af því  að fara á hestbak á hann Grettir og notar gjarnan tækifærið þegar hún kemur norður og bregður sér á bak.  Þarna er hann Egill Már svo að aðstoða frænku sína.  Enda er hann með Grettir í stífri þjálfun í vetur en Grettir er nú að verða 24 vetra í vor og er farin að láta aðeins á sjá.  Það er von okkar að hann endist sem lengst þar sem hann er án efa besti barnahestur sem hægt er að hugsa sér. 

Hún Kátína (Fáfnisdóttir) okkar er nú farin til nýrra eiganda á Sauðárkróki og vonum við að hún eigi eftir að reynast nýjum eigendum vel.


06.04.2009


Síðasta fimmtudagskvöld fór fram Árshátíð Þelamerkurskóla og var hún hin glæsilegasta.  Fjölmörg skemmtiatriði og greinilegt að krakkarnir og starfsfólkið lagði mikinn metnað í kvöldið.  Takk fyrir skemmtunina.  Myndirnar tók Anna Guðrún í Fornhaga.   Núna eru krakkarnir í páskafríi og njóta þess auðvitað í botn.   Nóg að gera hjá þeim: riðið út, farið á skíði eða sund, leikið við vinina og  glápt á sjónvarp fram eftir kvöldi.


28.03.2009

Við fengum góða gesti í hesthúsið í dag en það voru þær Jónína (systir),  Inga Matt, Anna Rósa og Dóra, allar kennarar í Þelamerkurskóla.  Dóra á stórafmæli í dag og var hún tekin á sveitarúnt í tilefni dagsins.  Allar fóru þær svo í hnakkinn og tóku sig vel út.  Stefna þær nú flestar á að taka þátt í næsta Bjargarmóti, allavega voru höfð um það stór orð í dag en sjáum svo hvað setur.  Til hamingju með daginn Dóra!!


17.03.2009

Á laugardagskvöldið fór Þór vestur á Sauðárkrók að taka þátt í áskorandakeppni riddara norðursins. Þetta er svona liðakeppni, þar sem keppt er í 4 greinum og má ekki vera sami knapi í neinni grein. En Það er hann Þorbjörn Matthíasson sem velur í lið fyrir Eyfirðinga.   Þorbjörn keppti í tölti, Anna Catarina í fjórgangi, Vignir í fimmgangi og Þór í skeiði á Seif.  Þór varð í öðru sæti í skeiði en liðið þeirra  vann heildarkeppnina eftir mikil átök í reipitogi.  Tvö lið voru jöfn, Eyfirðingar og Íbishóll og voru úrslitin semsagt ákveðin í reipitogi. 


14.03.2009

Á föstudagskvöldið fór fram 3 mótið í KEA mótaröðinni.  Það var keppt í smalakeppni og Gæðingafimi og var þetta frábært kvöld.  Smalakeppnin mjög skemmtileg og svo gekk Þór og Malin mjög vel.  Malin varð í öðru sæti í smala, í keppni minna keppnisvanra, á Gullbrá og Þór varð 3. í gæðingafiminni á Gusti frá Hálsi.  Þór vann svo smalakeppnina á Undra frá Mið-Koti en sá hestur var fenginn að láni hjá Þórdísi í Auðbrekku.  Þór mætti náttúrulega í smaladressinu að sveitamannasið en látum myndirnar tala sínu máli en þær voru fengnar á heimasíðu Léttis www.lettir.is og má þar sjá fullt af myndum frá þessu skemmtilega kvöldi.   Þór er nú efstur í samanlagðri stigakeppni mótanna en mjótt er á munum og mun áframhaldið verða spennandi. 


12.03.2009

Nýtt hlutafélag var stofnað í sveitinni, á laugardaginn síðasta, um meri nokkra sem lítið er vitað um annað er að hún er rauðtvístjörnótt sokkókk og einkar glæsileg.  Ein tillaga er komin af nafni á merina og er það nafnið Torfa (í höfuðið á fyrrum eiganda auk þess sem meirihluti félagsmanna eru búsettur í Torfunni svokallaðri.)  Félagsskapurinn verður þá líklega kallaður Torf-groop eða eitthvað áþekkt en um þetta á að greiða atkvæði á fyrsta aðalfundi sem haldinn verður mjög fljótlega.  Á myndinni eru frá vinstri Jóhannes Gísli í Þríhyringi, stofnandi Torf-groop, svo Torfa og svo Þór formaður. Á myndina vantar Gest Hauksson gjalkera og Arnar Sigfússon ritara. 
Ef einhver telur sig þekkja merina og vita eitthvað um ættir eða uppruna endilega hringið í Þór eða Gísla. 


08.03.2009


Í Febrúar kom Christina Lund, eigandi Álfs frá Selfossi, til okkar ásamt 2 vinkonum sínum.  Þær voru að skoða afkvæmi Álfs og safna myndum á heimasíðuna hans sem verið er að útbúa.  Við eigum 1 og hálft tryppi undan honum þau Álm og Bliku, en Bliku eigum við með Arnari á Vindheimum.  Tina Johanssen tók þessar myndir í þessari heimsókn.  Það er einnig mynd af Bliku á www.foli.is/?p=660
 

03.03.2009
Enn fleiri hross á sölusíðunni, Kátína (Fáfnisdóttir) og Anastasia(Þorradóttir)


01.03.2009

Ný hryssa á sölusíðunni okkar, Flóra frá Árgerði 5 v. alhliðameri.  Ýtið hér til að sjá myndir og frekari upplýsingar um hana.


23.02.2009

Lífið gengur sinn vanagang hér í sveitinni á þessum tíma.  Veðrið er búið að vera frábært en  í dag snjóar svolítið.  Malin og Þór eru að temja tryppin en ég er meira í því að temja kvígur!!!  Í haust bar hópur af kvígum, þær mjólka allar nokkuð vel og eru ágætlega þægar.  Núna hins vegar er annar hópur  að bera og eru þær flestar óþægar og efni í miklar leiðindaskjóður (greyin).   Krakkarnir eru byrjuð á reiðnámskeiði í reiðhöllinni á Akureyri og er það hún Lina Eriksson sem er að kenna þeim.   Á myndunum eru þeir Páll Skúlason á Seif,  Sverrir á Geisla og Þór á Mola.  En Páll og Sverrir riðu grimmt út um helgina á hestunum sínum og höfðu gaman af. 


08.02.2009

KEA mótaröðin hófst í reiðhöllinni á Akureyri á Laugardagskvöldið.  Þór og Malin, sænska tamningakonan, fóru og kepptu.  Keppt var í fjórgangi og skeiði.  Malin keppti á Gullbrá í fjórgangi og gekk bara ágætlega en komst þó ekki í úrslit.  Þór lenti í 3. sæti í fjórgangi á Geisla frá Úlfstöðum og í 1. sæti í skeiði á Seif.  Sem sagt góð byrjun á spennandi keppni.  Þetta var þó einungis undankeppnin.  Öll úrslit fara fram í lokin á vígluhátið reiðhallarinna, Fákum og fjöri. 


06.02.2009
 
Það skiptast á skin og skúrir í hestamennskunni á bænum.  Hún Flétta, reiðhryssan hans Agnars Páls, týndist um daginn og vorum við búin að leita og leita.   Hún fannst að lokum liggjandi hér í hólfinu rétt utan við bæinn, og er nú á hærri tilvistarsviðum.  Hennar er auðvitað sárt saknað, enda mikil öðlings hryssa.  Þæg og viljug.  Fyrsta myndin er tekin á Bjargarmótinum síðastliðið sumar, þar sem þau unnu pollaflokkinn.  Næstu  2 myndirnar eru teknar á Króknum, á sýningunni æskan og hesturinn síðastliðið vor.  Sú fjórða er svo tekinn á Goðamótinu á Akureyri 2008.

27.01.2009

Moli frá Skriðu - notkun 2009.

25.01.2009

Í dag var uppskeruhátíð hjá börnum og unglingum í hestamannafélaginu Létti á Akureyri.  Var hún haldin á La vita bella, þar voru snæddar pizzur og fleira og dagskrá vetrarins kynnt lauslega.  Nú eru að fara í gang ýmis námskeið á vegum félagsins og vonandi verða þau vel sótt.  Öll börnin fengu svo viðurkenningarskjal fyrir þáttöku í starfinu á síðastliðnu ári og einnig voru fjórir krakkar verðlaunaðir sérstaklega.  Þar á meðal hlaut hún Eyrún okkar titilinn knapi ársins í barnaflokki og erum við að vonum stolt af því.  Stefanía Árdís var svo knapi ársins í unglingaflokki, Guðlaugur Ari fékk verðlaun fyrir góða mætingu (ástundun) og Tómas fyrir framfarir.  Þetta var skemmtileg stund og virðist nú sem skemmtilegur vetur sé að hefjast í hestamennskunni hjá krökkunum. 


20.01.2009


Á laugardaginn var hin árlega folaldasýning Framfara haldin.  Að þessu sinni var hún haldin á Ytri-Bægisá hjá Hauk og Þorra.  65 folöld mættu til leiks og voru þau auðvitað hvert öðru glæsilegra.  Dómararnir voru 3, þeir Höskuldur Jónsson, Stefán Birgir Stefánsson og Þórarinn af Skallagrímsætt úr Þistilfirði.  Dómararnir völdu fyrst 6 hryssur og 6 hesta í undanúrslit og svo 3 efstu úr þeim hópi.  Við áttum efsta hestfolaldið hann Álm frá Skriðu sem er undan Álfi frá Selfossi og Moladótturinni Dalrós frá Arnarstöðum.   Álmur er á 2 fyrstu myndunum. Í öðru sæti var svo Milljarður frá Barká (undan Rökkva frá Hárlaugsstöðum)  og í því þriðja var svo Þjarkur frá Skriðu (síðasta myndin)en hann er undan Sif (Sunnudóttir) frá Skriðu og Geisla frá Úlfstöðum.  Við áttum einnig einn fola í viðbót í 6 hesta úrslitum en það var Djákni frá Skriðu undan Mola og Sóley frá Kálfskinni. 
Efst í hryssunum var Leynd frá Litlu-Brekku einnig undan Álfi.  Í öðru var Tildra frá Glæsibæ og í því þriðja var Álfamær frá Barká.  Við áttum svo eina meri í undanúrslitunum en það var Bylgja frá Skriðu undan Dimmu frá Akri og Markúsi.  Bylgja er á 4 myndinni ásamt hálfsystir sinni Elju frá Skriðu undan Rauðhettu og Markúsi.  Á fimmtu  myndinni eru svo Djákni frá Skriðu (nær) og Kjarkur frá Skriðu, tveir flottir Molasynir.  Kjarkur er undan Sunnu frá Skriðu.   Álmur var svo einnig kosinn glæsilegasta folaldið, en það eru áhorfendur sem kjósa það. 
Þetta var skemmtilegur dagur, margt fólk og allir virtust skemmta sér vel.  Verðlaunin voru ekki af verri endanum heldur, folaldakjöt bæði reykt, nýtt og saltað í fötu. Það var sláturhúsið og kjötvinnsla B.Jenssen sem gaf verðlaunin.  Síðan var uppskeruhátíð Framfara haldin um kvöldið á Melum og var þar partý fram á nótt. 


10.01.2009

kíkið inn á Hross til sölu!!